ഏറ്റവും കൂടുതല്‍ കാലം സംസ്ഥാന വൈദ്യുതി വകുപ്പ് കൈകാര്യം ചെയ്തു
കേരളത്തില്‍ ഏറ്റവും കൂടുതല്‍ കാലം നിയമസഭാംഗവും മന്ത്രിയുമായ നേതാവാണ് കെ.എം.മാണി. 1965-ല്‍ പാലായില്‍നിന്ന് ആദ്യമായി നിയമസഭാംഗമായി ജയിച്ചു. അത്തവണ സഭ ചേർന്നില്ല. 1967-ലെ തിരഞ്ഞെടുപ്പില്‍ വീണ്ടും ജയിച്ചു. പിന്നീട് ഇതുവരെ എല്ലാ തിരഞ്ഞെടുപ്പിലും പാലായില്‍നിന്ന് നിയമസഭയിലെത്തി. ഒരേ മണ്ഡലത്തില്‍നിന്ന് ഏറ്റവും കൂടുതല്‍ തവണ(13) ജയിച്ച എം.എല്‍.എ., ഏറ്റവും കൂടുതല്‍ കാലം(24 വര്‍ഷം) മന്ത്രിസ്ഥാനം വഹിച്ച എം.എല്‍.എ., ഏറ്റവും കൂടുതല്‍ മന്ത്രിസഭകളില്‍ അംഗം(12), കൂടുതല്‍ സംസ്ഥാന ബജറ്റ് അവതരിപ്പിച്ച ധനമന്ത്രി(13 തവണ), ഏറ്റവും കൂടുതല്‍ കാലം ധനവകുപ്പും(11 വര്‍ഷം 8 മാസം), നിയമ വകുപ്പും(21 വര്‍ഷം 2 മാസം), കൈകാര്യം ചെയ്ത മന്ത്രി തുടങ്ങിയ റെക്കോഡുകള്‍ കെ.എം.മാണിയുടെ പേരിലുണ്ട്. 1933 ജനുവരി 30-ന് കോട്ടയം ജില്ലയിലെ മീനച്ചിലായിരുന്നു ജനനം. 2019 ഏപ്രില്‍ 10-ന് 86-ാം വയസ്സില്‍ അന്തരിച്ചു.