ഫ്രാന്‍സ്
ഫ്രാന്‍സിലെ ബിയാറിറ്റ്‌സില്‍ ഓഗസ്റ്റ് 25-നാണ് 45-ാമത് ജി 7 ഉച്ചകോടി തുടങ്ങിയത്. ഫ്രാന്‍സ്, ജര്‍മനി, ഇറ്റലി, യു.കെ., യു.എസ്., കാനഡ, ജപ്പാന്‍ എന്നീ രാജ്യങ്ങളും യൂറോപ്യന്‍ യൂണിയനുമാണ് ജി 7 രാജ്യങ്ങള്‍. ഇന്ത്യയ്ക്ക് പുറമെ ഓസ്‌ട്രേലിയ, ചിലി, ഈജിപ്ത്, സ്‌പെയിന്‍, റുവാന്‍ഡ എന്നീ ആറ് രാജ്യങ്ങളാണ് പ്രത്യേക ക്ഷണിതാവായി പങ്കെടുക്കുന്നത്. ഇന്ത്യയെ പ്രതിനിധീകരിച്ച് പ്രധാന മന്ത്രി നരേന്ദ്ര മോദിയാണ് പങ്കെടുക്കുന്നത്.

പി.വി. സിന്ധു
സ്വിറ്റ്‌സര്‍ലന്‍ഡിലെ ബാസലില്‍ 2019 ഓഗസ്റ്റ് 25-ന് നടന്ന ഫൈനലില്‍ ജപ്പാന്റെ നൊസോമി ഒക്കുഹാരയെ പരാജയപ്പെടുത്തിയാണ് ഇന്ത്യയുടെ പി.വി. സിന്ധു ലോക ബാഡ്മിന്റണ്‍ വനിത വിഭാഗത്തില്‍ കിരീടം നേടിയത്. 2017-ലും 2018-ലും ലോക ചാമ്പ്യന്‍ ഷിപ്പ് ഫൈനലിലെത്തിയിരുന്നെങ്കിലും സിന്ധുവിന് ജയിക്കാനായിരുന്നില്ല. ലോക ചാമ്പ്യന്‍ഷിപ്പില്‍ സിന്ധുവിന്റെ അഞ്ചാം മെഡലാണ് ഇത്തവണത്തെ സ്വര്‍ണം. ലോക ബാഡ്മിന്റണ്‍ പുരുഷ സിംഗിള്‍സില്‍ ജപ്പാന്റെ കെന്റോ മൊമോട്ടയാണ് ഇത്തവണത്തെ ചാമ്പ്യന്‍.

യു.എ.ഇ.
യുണൈറ്റഡ് അറബ് എമിറേറ്റ്‌സിന്റെ പരമോന്നത സിവിലിയന്‍ ബഹുമതിയാണ് ഓര്‍ഡര്‍ ഓഫ് സയിദ്. യു.എ.ഇയുടെ സ്ഥാപകനായ ഷെയ്ഖ് സയിദ് ബിന്‍ സുല്‍ത്താന്‍ അല്‍ നഹ്യാന്റെ സ്മരണയ്ക്കായുള്ളതാണ് ഈ ബഹുമതി. അദ്ദേഹത്തിന്റെ നൂറാം ജന്മവാര്‍ഷികത്തിലാണ് മോദിക്ക് ഈ പുരസ്‌കാരം ലഭിച്ചതെന്ന പ്രത്യേകതയുമുണ്ട്.

മെഡിസെപ്
കേരള സര്‍ക്കാര്‍ ജീവനക്കാര്‍ക്കും പെന്‍ഷന്‍കാര്‍ക്കും ആശ്രിതര്‍ക്കുമുള്ള മെഡിക്കല്‍ ഇന്‍ഷുറന്‍സ് പദ്ധതിയാണ് മെഡിസെപ്. Medical Insurance Scheme for State Employees and Pensioners (MEDISEP) എന്നാണ് ഇതിന്റെ മുഴുവന്‍ രൂപം. 11 ലക്ഷത്തോളം പേര്‍ക്ക് പദ്ധതി പ്രയോജനപ്പെടുമെന്നാണ് കണക്ക്. 2017-18 ലെ ബജറ്റില്‍ പ്രഖ്യാപിച്ച പദ്ധതിയാണിത്. സ്വകാര്യ കമ്പനിയായ റിലയന്‍സിനായിരുന്നു ഇതിന്റെ നടത്തിപ്പ് ചുമതല ആദ്യം നല്‍കിയതെങ്കിലും ഇപ്പോള്‍ റിലയന്‍സുമായുള്ള കരാര്‍ റദ്ദാക്കിയിരിക്കുകയാണ്.

സംഗീത സംവിധായകന്‍
കഭീ കഭീ... മേരേ ദില്‍മേം... എന്ന് തുടങ്ങുന്ന പ്രശസ്ത ഗാനത്തിന്റെ സംഗീത സംവിധായകനാണ് മുഹമ്മദ് സഹൂര്‍ ഖയ്യാം. മുപ്പതിലേറെ സിനിമകളില്‍ സംഗീത സംവിധാനം നിര്‍വഹിച്ച ഖയ്യാം പദ്മഭൂഷണ്‍, ദേശീയ ചലച്ചിത്ര പുരസ്‌കാരം, ഫിലിംഫെയര്‍ പുരസ്‌കാരം തുടങ്ങിയ ഒട്ടേറെ ബഹുമതികള്‍ നേടിയിട്ടുണ്ട്. 2019 ഓഗസ്റ്റ് 19-ന് മുംബൈയില്‍ അന്തരിച്ച ഖയ്യാമിന് 92-ാം വയസ്സായിരുന്നു.

ബ്രസീല്‍
ആമസോണ്‍ മഴക്കാടുകളുടെ 60 ശതമാനത്തോളം ബ്രസീലിലാണ്. 13 ശതമാനം പെറുവിലും 10 ശതമാനം കൊളംബിയയിലുമാണ്. ശേഷിക്കുന്ന ഭാഗം വെനസ്വേല, ഇക്വഡോര്‍, ബൊളീവിയ, ഗയാന, സുരിനാം തുടങ്ങിയ രാജ്യങ്ങളിലാണ്. 55 ലക്ഷം ചതുരശ്ര കിലോമീറ്ററോളം വിസ്തൃതിയുള്ളതാണ് ആമസോണ്‍ മഴക്കാടുകള്‍. ലോകത്തിന്റെ ശ്വാസനാളം എന്നാണ് ആമസോണ്‍കാടുകള്‍ വിശേഷിപ്പിക്കപ്പെടുന്നത്.

രാജസ്ഥാന്‍
28 വര്‍ഷം രാജ്യ സഭാംഗമായിരുന്ന മന്‍മോഹന്‍ സിങ്ങിന്റെ അംഗത്വ കാലാവധി 2019 ജൂണില്‍ തീര്‍ന്നിരുന്നു. അസമില്‍നിന്നായിരുന്നു അദ്ദേഹം രാജ്യ സഭാംഗമായത്. രാജസ്ഥാനില്‍നിന്ന് ഇപ്പോള്‍ എതിരില്ലാതെയാണ് തിരഞ്ഞെടുക്കപ്പെട്ടത്.

ലോക്‌സഭയില്‍ പ്രതിപക്ഷ നേതാവായിരുന്നു
രാഷ്ട്രീയ ജീവിതത്തിലൊരിക്കലും ലോക്സഭാ തിരഞ്ഞെടുപ്പില്‍ വിജയിച്ചിട്ടില്ലാത്ത നേതാവായിരുന്നു അരുണ്‍ ജെയ്റ്റ്‌ലി. 18 വര്‍ഷത്തോളം ഗുജറാത്തില്‍ നിന്നുള്ള രാജ്യ സഭാംഗമായിരുന്നു. പിന്നീട് ഉത്തര്‍പ്രദേശില്‍നിന്നുള്ള രാജ്യസഭാംഗമായി. രാജ്യസഭയില്‍ പ്രതിപക്ഷ നേതൃ പദവി വഹിച്ചിട്ടുണ്ട്. 1999-ലെ വാജ്‌പേയി സര്‍ക്കാരിലാണ് ആദ്യമായി കേന്ദ്ര മന്ത്രിയായത്. 2014-ലെ ലോക്‌സഭാ തിരഞ്ഞെടുപ്പില്‍ അമൃത്സറില്‍നിന്ന് മത്സരിച്ചെങ്കിലും അമരീന്ദര്‍സിങ്ങിനോട് പരാജയപ്പെട്ടു. 2019 ഓഗസ്റ്റ് 24-നാണ് ജെയ്റ്റ്‌ലി അന്തരിച്ചത്.

ശുചിത്വം
കേന്ദ്ര കുടിവെള്ള മന്ത്രാലയത്തിന്റെ നേതൃത്വത്തിലാണ് രാജ്യത്തെ എല്ലാ ജില്ലകളിലും ശുചിത്വ സര്‍വേ നടത്തുന്നത്. സ്വതന്ത്ര ഏജന്‍സി നടത്തുന്ന സര്‍വേയില്‍ വിവിധ ഘടകങ്ങള്‍ പരിശോധിച്ച് ജില്ലകള്‍ക്കും സംസ്ഥാനത്തിനും റാങ്ക് നിശ്ചയിക്കുകയാണ് ലക്ഷ്യം. പൊതുജനങ്ങള്‍ക്ക് എസ്.എസ്.ജി. 2019 എന്ന മൊബൈല്‍ ആപ്പ് വഴി അഭിപ്രായം രേഖപ്പെടുത്താനും അവസരമുണ്ട്. ശുചിത്വ പ്രവര്‍ത്തനങ്ങള്‍ മികച്ച രീതിയില്‍ നടപ്പാക്കുന്ന ജില്ലയ്ക്കും സംസ്ഥാനത്തിനും സര്‍വേ റിപ്പോര്‍ട്ടിന്റെ അടിസ്ഥാനത്തില്‍ കേന്ദ്ര സര്‍ക്കാര്‍ അവാര്‍ഡ് നല്‍കും.

ഗോകുലം കേരള എഫ്.സി.
കൊല്‍ക്കത്തയിലെ സാള്‍ട്ട്ലേക്ക് സ്റ്റേഡിയത്തില്‍ നടന്ന ഫൈനലില്‍ മോഹന്‍ബഗാനെ 2-1-ന് പരാജയപ്പെടുത്തിയാണ് ഗോകുലം കിരീടം നേടിയത്. ട്രിനിഡാഡുകാരനായ മാര്‍ക്കസ് ജോസഫാണ് ഗോകുലം എഫ്.സിയുടെ ക്യാപ്റ്റന്‍. 1997-ല്‍ എഫ്.സി.കൊച്ചിനാണ് ഡ്യുറന്‍ഡ് കപ്പ് ഇതിനുമുമ്പ് നേടിയ കേരള ടീം. ഐ.എം. വിജയനായിരുന്നു അന്ന് എഫ്.സി. കൊച്ചിന്റെ നായകന്‍.