ജിംസ്
ഗവണ്‍മെന്റ് ഇന്‍സ്റ്റന്റ് മെസേജിങ് സിസ്റ്റം എന്നതിന്റെ ചുരുക്ക രൂപമാണ് ജിംസ്. നാഷണല്‍ ഇന്‍ഫര്‍മാറ്റിക് സെന്ററാണ് ഇത് വികസിപ്പിക്കുന്നത്. വാട്‌സ് ആപ്പ് ഫീച്ചറുകളെല്ലാം ഉള്‍പ്പെടുത്തിയാണ് പുതിയ സംവിധാനം തയ്യാറാക്കുന്നത്.

സംഗീതം
അമേരിക്കയിലെ ദ റെക്കോഡിങ് അക്കാദമിയാണ് സംഗീത രംഗത്തെ മികവിന് എല്ലാ വര്‍ഷവും ഗ്രാമി അവാര്‍ഡ് നല്‍കുന്നത്. ഗ്രാമ ഫോണ്‍ അവാര്‍ഡ് എന്നതിന്റെ ചുരുക്കപ്പേരാണ് ഗ്രാമി. 1959-ലാണ് ഈ അവാര്‍ഡ് ആദ്യമായി നല്‍കിയത്. 62-ാമത് അവാര്‍ഡ് 2020 ജനുവരി 27-ന് പ്രഖ്യാപിച്ചു. മികച്ച ഗാനം, ആല്‍ബം, റെക്കോഡ്, പുതുമുഖ സംഗീതജ്ഞ, ആല്‍ബം ഓഫ് ദ ഇയര്‍ എന്നിങ്ങനെ അഞ്ച് പുരസ്‌കാരങ്ങള്‍ നേടി ബില്ലി ഐലിഷ് എന്ന 18കാരി ഇത്തവണ റെക്കോഡിട്ടു.

ജനുവരി 25
ഇലക്ഷന്‍ കമ്മിഷന്‍ നിലവില്‍ വന്നതിന്റെ സ്മരണയ്ക്കായാണ് ജനുവരി 25 എല്ലാ വര്‍ഷവും ദേശീയ സമ്മദിതായക ദിനമായി ആചരിക്കുന്നത്. 1950 ജനുവരി 25-നാണ് ഇന്ത്യയില്‍ ഇലക്ഷന്‍ കമ്മിഷന്‍ സ്ഥാപിതമായത്. ഭരണഘടനയുടെ ആര്‍ട്ടിക്കിള്‍ 324 പ്രകാരമാണ് ഇലക്ഷന്‍ കമ്മിഷന്‍ രൂപവത്കരിച്ചത്. 2011-ലാണ് ജനുവരി 25 വോട്ടേഴ്‌സ് ദിനമായി ആദ്യം ആചരിച്ചത്. 2020-ലേത് പത്താമത് സമ്മദിതായക ദിനാചരണമായിരുന്നു.

ബാസ്‌കറ്റ് ബോള്‍
അമേരിക്കന്‍ ബാസ്‌കറ്റ് ബോള്‍ ഇതിഹാസമായ കോബി ബ്രയന്റ്‌റ്(41 വയസ്സ്) ജനുവരി 26-നാണ് കാലിഫോര്‍ണിയയിലെ കലബസാസില്‍ ഹെലിക്കോപ്റ്റര്‍ അപകടത്തില്‍ കൊല്ലപ്പെട്ടത്. അഞ്ചുതവണ ലോകചാമ്പ്യന്‍, 18 തവണ ഓള്‍ സ്റ്റാര്‍, മോസ്റ്റ് വാല്യബിള്‍ പ്ലെയര്‍, രണ്ട് തവണ ഒളിമ്പിക് സ്വര്‍ണ മെഡല്‍ തുടങ്ങിയ നേട്ടങ്ങള്‍ കോബി ബ്രയന്റ് സ്വന്തമാക്കിയിട്ടുണ്ട്.

2019 നോവല്‍ കൊറോണ
ചൈനീസ് കോബ്ര, ചൈനാസ് ക്രയ്റ്റ് എന്നീ പാമ്പുകളാകാം ഈ വൈറസിന്റെ ഉറവിടം എന്നാണ് പ്രാഥമിക നിഗമനം. ജനിതക പരിശോധനയിലൂടെ ചൈനീസ് ശാസ്ത്രജ്ഞരാണ് ഈ നിഗമനത്തിലെത്തിയത്. ചൈനീസ് നഗരമായ വൂഹാനാണ് രോഗത്തിന്റെ പ്രഭവ കേന്ദ്രം. ചൈനയ്ക്ക് പുറമെ ഒട്ടേറെ വിദേശ രാജ്യങ്ങളിലും വൈറസിന്റെ സാന്നിധ്യം സ്ഥിരീകരിച്ചിട്ടുണ്ട്. 100-ലേറെപ്പേർ വൈറസ് ബാധിച്ച് മരിച്ചു.

100 ശതമാനം
എയര്‍ ഇന്ത്യയുടെയും എയര്‍ ഇന്ത്യ എക്‌സപ്രസിന്റെയും മുഴുവന്‍ ഓഹരികളും വില്‍ക്കാനാണ് കേന്ദ്ര സര്‍ക്കാരിന്റെ തീരുമാനം. സിങ്കപ്പുര്‍ എയര്‍ലൈന്‍സുമായി സഹകരിച്ചുള്ള സംയുക്ത സംരംഭമായ ഐസാറ്റ്‌സിന്റെ പകുതി ഓഹരികളും ഇതോടൊപ്പം വില്‍ക്കും.

ഹിന്ദുസ്ഥാനി സംഗീതം
ഇന്ത്യയിലെ ഏറ്റവും വലിയ രണ്ടാമത്തെ സിവിലിയന്‍ ബഹുമതിയാണ് പദ്മ വിഭൂഷന്‍. ഏഴ് പേര്‍ക്കാണ് ഇത്തവണ പദ്മ വിഭൂഷന്‍ ലഭിച്ചത്. സോഷ്യലിസ്റ്റ് നേതാവ് ജോര്‍ജ് ഫെര്‍ണാണ്ടസ്, മുന്‍ കേന്ദ്ര മന്ത്രിമാരായ അരുണ്‍ ജെയ്റ്റ്‌ലി, സുഷമ സ്വരാജ്, ഉടുപ്പി മഠാധിപതിയായിരുന്ന വിശ്വേശതീര്‍ഥ സ്വാമി എന്നിവര്‍ക്ക് മരണാനന്തര ബഹുമതിയായി പദ്മവിഭൂഷന്‍ സമര്‍പ്പിച്ചു. ബോക്‌സിങ് താരം മേരികോം, മൗറീഷ്യസ് പൊതുപ്രവര്‍ത്തകന്‍ അനിറൂഡ് ജഗ്നാഥ് എന്നിവരാണ് ചാന്നുലാല്‍ മിശ്രയ്ക്ക് പുറമെ പദ്മവിഭൂഷന്‍ നേടിയ ജീവിച്ചിരിക്കുന്നവര്‍. 16 പേര്‍ക്ക് പദ്മ ഭൂഷനും 118 പേര്‍ക്ക് പദ്മശ്രീയും ഇത്തവണ സമ്മാനിച്ചു.

അസം
അസമിലെ ബോഡോ വിഭാഗക്കാര്‍ക്ക് പ്രത്യേക സംസ്ഥാനം വേണമെന്ന ആവശ്യവുമായി സായുധ പോരാട്ടം നടത്തുന്നവരാണ് ബോഡോ സായുധ സംഘങ്ങള്‍. 27 വര്‍ഷത്തിനിടെ ബോഡോ പ്രക്ഷോഭകാരികളുമായി കേന്ദ്ര സര്‍ക്കാര്‍ ഒപ്പിടുന്ന മൂന്നാമത്തെ കരാറാണ് ഇത്തവണത്തേത്. കേന്ദ്ര ആഭ്യന്തര മന്ത്രി അമിത്ഷായുടെ സാന്നിധ്യത്തില്‍ അസം മുഖ്യമന്ത്രി സര്‍ബാനന്ദ് സോനേവാളാണ് ബോഡോ സംഘടനകളുടെ നേതാക്കള്‍ക്കൊപ്പം കരാറില്‍ ഒപ്പിട്ടത്.

ഇന്ത്യയും റഷ്യയും
ജനുവരി 22-ന് ഡല്‍ഹിയിലായിരുന്നു ചര്‍ച്ച. ഗംഗ-വോള്‍ഗ ഡയലോഗ് ഒഫ് സിവിലൈസേഷന്‍ എന്നായിരുന്നു ഇരു രാജ്യങ്ങളും തമ്മിലുള്ള ചര്‍ച്ചയുടെ മുഴുവന്‍ പേര്. 2018-ല്‍ നരേന്ദ്ര മോദിയും റഷ്യന്‍ പ്രസിഡന്റ് വ്‌ലാദമിര്‍ പുടിനും തമ്മില്‍ നടന്ന കൂടിക്കാഴ്ചയില്‍ ഉരുത്തിരിഞ്ഞ ആശയമാണ് കൂടുതല്‍ സഹകരണത്തിനുള്ള ഗംഗ-വോള്‍ഗ ഡയലോഗ്. പരസ്പര ബന്ധം മെച്ചപ്പെടുത്താനുള്ള സാധ്യതകളാണ് ഇത്തവണത്തെ ചര്‍ച്ചയില്‍ പ്രധാനമായി നടന്നത്. റഷ്യയുടെ ദേശീയ നദിയായി പരിഗണിക്കപ്പെടുന്ന വോള്‍ഗ യൂറോപ്പിലെ ഏറ്റവും നീളം കൂടിയ നദിയാണ്.

മഹാരാഷ്ട്ര
സംസ്ഥാനത്തെ എല്ലാ ജില്ലാ ആസ്ഥാനങ്ങളിലും ഒരു ശിവ ഭോജന്‍ കാന്റീന്‍ തുടങ്ങാനാണ് മഹാരാഷ്ട്ര സര്‍ക്കാരിന്റെ തീരുമാനം. പദ്ധതി വിജയിച്ചാല്‍ കൂടുതല്‍ കേന്ദ്രങ്ങളില്‍ കാന്റീന്‍ തുടങ്ങും. 6.4 കോടി രൂപയാണ് പദ്ധതിക്കായി നീക്കിവെച്ചിരിക്കുന്നത്.